Цели на проектот
Надредената цел е подигнување на свеста кај академската фела и надлежните институции за предизвиците и спецификите на толкувањето во контекст на хуманитарната и прекуграничната миграција, како и придонес кон диверзификација на дидактичките материјали преку развивање разновидни едукативни алатки.
Проектот е одговор на дефицитарната академска инфраструктура за толкувањето за јавните служби, со фокус на интеракциите во транзитните зони за бегалци, при истовремено голема побарувачка на пазарот на трудот. Ова особено се однесува на Северна Македонија и Грција на јужниот раб од Балканската рута и на Австрија и Словенија, каде што главно се слеваат миграциските егзодуси. Проектот не претендира целосно да ги надмине глобалните недостатоци, туку да придонесе кон нивното ублажување преку академски пристап.
Партнерството има цел да подготви лесно пристапна дигитална платформа со современи едукативни алатки за професори и студенти, владиниот и невладиниот сектор, професионални и непрофесионални толкувачи, бегалци, мигранти и други засегнати корисници. Преку иновативни методологии и технологии се развиваат подкасти, водкасти, едукасти и симулации на автентични толкувачки интеракции.