Проекти

Lancement d’un dictionnaire visuel franco-macédonien

Проект посветен на издавањето и промоцијата на првиот француско-македонски сликовен речник за ученици од VI до IX одделение, со цел унапредување на наставата по француски јазик и афирмација на визуелната и педагошката лексикографија.

Основни податоци за проектот

Наслов на проектот: Lancement d’un dictionnaire visuel franco-macédonien à l’occasion du 30ᵉ anniversaire de l’AUF-ECO / Издавање и промоција на Француско-македонскиот сликовен речник реализиран во рамки на повикот на УАФ за одбележување на 30-годишнината од основањето на Регионалната дирекција на Универзитетската агенција за Франкофонија за Централна и Источна Европа (AUF-ECO).

Период на реализација: април – ноември 2024 година

Носител на проектот: Филолошки факултет „Блаже Конески“, Скопје, Универзитет „Св. Кирил и Методиј“ во Скопје

Финансиска поддршка: Универзитетска агенција за франкофонија (AUF), во рамките на одбележувањето на 30-годишнината од основањето на Регионалната дирекција за Централна и Источна Европа (AUF-ECO), Филолошки факултет „Блаже Конески“, Скопје, Универзитет „Св. Кирил и Методиј“ во Скопје и Министерството за образование и наука на РСМ.

Учесници во проектот:

  • проф. д-р Милена Касапоска-Чадловска – координатор на проектот
  • проф. д-р Ирина Бабамова – член на проектниот тим
  • м-р Анита Кузманоска – член на проектниот тим

Партнери:

  • Издавачка куќа „Просветно дело“, Скопје
  • Здружение на професорите по француски јазик на Република Македонија

Опис и цели на проектот

Проектот беше реализиран во 2024 година, во рамките на активностите посветени на 30-годишнината од основањето на Регионалната дирекција за Централна и Источна Европа.

Проектните активности беа насочени кон научно и стручно претставување на првиот француско-македонски сликовен речник наменет за ученици од VI до IX одделение, изработен од авторски тим од Катедрата за романски јазици и книжевности при Филолошкиот факултет „Блаже Конески“ – Скопје, во соработка со издавачката куќа „Просветно дело“.

Основната цел на проектот беше да се афирмира значењето на визуелната и педагошката лексикографија во наставата по француски јазик, да се претстават методолошките принципи и предизвиците при изработката на речникот, како и да се поттикне интересот за изучување на францускиот јазик.

Реализирани проектни активности

Мај 2024 година – Учество на меѓународен научен собир во Белград

Членовите на проектниот тим учествуваа на меѓународниот научен собир „Српски денови на речниците“ (Journées serbes des dictionnaires), одржан од 24 до 26 мај 2024 година на Филолошкиот факултет при Универзитетот во Белград, со научен труд посветен на методолошките аспекти и искуствата од изработката на Француско-македонскиот сликовен речник.

Учеството овозможи претставување на резултатите од работата на авторскиот тим пред меѓународната научна јавност, размена на научни и стручни искуства со истражувачи од областа на лексикографијата и нивно вградување во конечната верзија на речникот.

26 септември 2024 година – Промоција на Француско-македонскиот сликовен речник

По повод Европскиот ден на јазиците беше организирана промоција на Француско-македонскиот сликовен речник, во соработка со издавачката куќа „Просветно дело“, на која беа претставени неговата концепција, структура, содржина и можностите за примена во наставата по француски јазик.

Промоцијата имаше цел да ја запознае наставната и пошироката франкофонска заедница со ова ново дидактичко помагало и да го истакне неговиот придонес кон унапредување на изучувањето на францускиот јазик во основното образование.

Резултати од проектните активности

Промовирано издание

Касапоска-Чадловска, М., Алексоска-Чкатроска, М., Бабамова, И., Велевска, М., Кузманоска, А., Лазаревска, С., Петрова, С., Трајкова, М., Хаџи-Лега Христоска, Ј. (2024). Француско-македонски сликовен речник за ученици од VI до IX одделение = Dictionnaire visuel français-macédonien pour collégiens de la VIe à la IXe classe. Просветно дело, Скопје.

Објавен научен труд

Babamova, I., Kasaposka-Chadlovska, M., Kuzmanoska, A. (2026). Constitution du Dictionnaire visuel français-macédonien pour collégiens : partage d’expérience. Actes du colloque international « Journées serbes des dictionnaires » 1, vol. 1, 2026, 129–138.

Прочитај го научниот труд (PDF)